市場熱線：南車時代錢途光明

祖國股民無懼加息

尋日祖國公布個PMI係下跌，但滙豐另一個PMI則上升，但市場冇乜反應，皆因PMI有過年因素，好多廠家提前月底已經畀民工返鄉。祖國股民博兔年開紅盤，但似乎唔擔心年卅晚加息，如果一月CPI真係坐五望六嘅話，就算過年前唔加，過年後亦會加。

I.T（00999）買咗「猿人tee」返嚟，古勝自問對呢啲潮人服飾冇乜研究，但喺街度亦見唔少人着，聽講呢個牌子啲T恤賣到成千蚊件，心諗用2,200萬港元就買到一個知名東瀛品牌，應該係相當着數，但睇埋落去，原來「猿人」喺日本其實係一路蝕錢，淨負債亦接近1億，所以冇咁大隻蛤乸隨街跳。I.T股價尋日亦升3.8%。零售股都沉咗好耐，直情有散貨格，尋日陪I.T齊齊升，但仲未似轉強。

中燃復牌算跌得少

中國燃氣（00384）復牌插14.7%，已經算插得少，因為佢拉閘期間其他二三線股都有咁上下跌幅。作為散戶好難評估單嘢對公司有幾大影響，如果只係涉及湖北項目佔佢市值唔夠2%，當然係影響好微，但事件已係6年幾前，所謂一不離二、二不離三，有幾多「蘇州屎」未曝光真係惡估。

古勝對啲大股東只係揸好少股權嘅公司一向覺得唔多穩陣，因為大股東係用其他人嘅錢去投資；好似中國森林（00930）個CEO突然沽貨，以後逢親管理層減持，孖屐肯定眼眉跳。

中國南車（01766）發完盈喜，又獲阿媽應承注入貨車業務資產，芸芸眾股當中，難得保持強勢，雖然公司已否認同北車合併，但內地傳媒仍然唱緊南北聯手。當然，合併嘅好處大家都睇得到，所以你有你否認，我有我繼續唱。佢同個仔仔南車時代（03898）前景點好係人都知，祖國不斷起鐵路，而老美都唔執輸，南車仲同GE合作爭定單，如果真係攞到美國合同，股價又唔係咁計。

兩母子同樣被睇好

好嘢自然會貴，問題係大家仲買唔買得落手，南車預告賺多5成以上，即係PE40倍有多；南車時代嘅盈喜就話會遠高過○九年，但吊你癮冇講賺多幾多，照計兩母子增長速度應該唔會相差好遠，坊間預測佢PE約33.8倍，稍為抵過阿媽。野村上月中曾出報告評價南車兩母子，南車只係中性，但南車時代就建議買入，目標價38蚊，原因係最近和諧號CRH380A型電力車組投產，動車組列車業務舊年收入增長一倍，今年仍係主要增長點。

孖屐鍾意用PEG計增長股，即係幾十倍PE都未必貴，只要你每年增長有幾十個巴仙就得。南車時代股價跟住50日線上，一於訂好止賺位繼續揸實。

戰報

力寶華潤（00156）+8%

古晨於周一指力寶華潤開始有動靜，原來公司增持附屬權益，股價昨創52周新高，兩日下來便足足升逾8%。

上海電氣（02727） +7%

古勝於上周二吼中隻上海電氣，股份雖一度回吐，但若然當日成功低位上車，昨日都有7%利潤， 經已相當唔錯。

古勝