「一年容易又過年，股市重溫最合時」，兔年就快跳入我哋嘅懷抱，先預祝大家「兔年股運亨通！」
由於近期巿場上流動資金明顯減少，港股嘅成交金額亦慢慢縮，冇得郁，大巿上升動力明顯減弱，亦都跟唔到海外股巿上揚。雖然港股近期「腳軟軟」咁，但個人認為港股短期大跌風險亦都唔大，主要原因包括以下數點。首先，歐債危機略為紓緩（基本上歐盟一定要頂住）、歐元匯價大幅反彈同美匯指數喺78水平以下，幫到投資者做美元套息交易，令巿場上流動資金相對充裕。
其次，避險情緒降低，金價回落，亦帶動資金流出商品巿場轉入股巿。第三，美國季度業績理想，支持美股反覆向上，再創高峰，對港股都有支持作用。
最後，目前港股估值唔高，恒指一一年度預計巿盈率大概13.5倍。除非企業盈利出現大倒退，如果唔係恒指下跌空間都係相對有限，照舊睇睇23,000點如何奮勇捱落去。
中聯重科（01157）係一間提供混凝土機械、起重機械同環衞機械等多元化產品嘅市場領導工程機械製造商。
中國將繼續推進城市化就唔使講，喺未來幾年有機會升到50%以上，持續帶動中國嘅基建工程機械需求。隨住內地經濟「火紅火綠」，基礎設施嘅投資同大量興建保障性住房將增加對工程機械直接需求，前景可以睇高一線。繼續由虎年追蹤到兔年，出發！
香港大學電子金融服務榮譽助理教授 徐燦傑