「股神」巴菲特及蓋茨呢兩位為發展慈善事業不遺餘力嘅死黨，繼去年九月底到中國游說內地富豪捐身家後，今年又再準備出動。蓋茨話計劃喺6個月之內，與老婆梅林達及巴菲特齊齊「出使」印度，游說當地以穆凱什安巴尼為首嘅富豪及商界領袖捐身家行善。
雖然暫時唔會知道佢哋今次勸捐之旅嘅成果，但其實有啲印度富豪本身都相當有善心，而且會「自動自覺」做善事，好似當地第三大富翁Azim Premji，計劃將總值20億美元嘅Wipro股份轉移到一隻信託基金，然後將公司派出嚟嘅股息用喺當地慈善事業。
另一方面，蓋茨相當強調捐獻嘅重要性，而且好希望各地富豪能夠多多益善，因為佢好想令到約喺20年前，平均每年導致全球最少35萬個兒童癱瘓嘅小兒麻痹症可完全絕迹。佢又話喺今次印度勸捐之旅完結後，或會再次到訪印度以及去一趟尼日利亞，專注實行杜絕小兒麻痹症嘅計劃，因為呢兩個地方係傳統上小兒麻痹症傳染比例最高嘅國家。據悉自從研發出更有效嘅疫苗後，去年呢兩個國家嘅小兒麻痹症個案均大減95%。
余絲韻