絲絲講場：阿里派「紅包」勁和味
新春將至，相信唔少打工仔已收到年終花紅，可能好多人已差唔多用完添，但阿里巴巴（01688）員工就唔同，因為佢哋今年除咗年終獎之外，仲首次獲主席馬雲派發「特別紅包」，呢封「紅包」絕對唔講得笑，聽講最少都有888元（人民幣‧下同），最高嘅更有6位數字o架！
入職逾7年收6位數
「紅包」有幾大封就要視乎員工加入集團嘅年資及崗位性質，聽講一位喺技術部做咗四年幾嘅員工，佢封「紅包」竟然有成3萬幾蚊；另一位喺同系公司支付寶工作咗3年嘅員工，佢封「紅包」亦有萬幾蚊，而入職7年以上嘅，「紅包」就有6位數喇。
對於員工點樣使「紅包」，馬雲就有3個建議，其一係將一半畀父母、另一半與子女買份禮物；其二係主要喺淘寶消費；其三係向集團嘅愛心基金支付寶帳號派發一封10蚊至100蚊嘅小紅包。不過聽講唔少人收到「紅包」後，第一時間就喺淘寶買部iPhone及iPad，估計馬雲呢封「紅包」嘅錢大部分去咗蘋果公司。
余絲韻