絲絲出年又有多兩封利是收喇！事關行內公認「省鏡」嘅「輪后」、法巴零售衍生產品部聯席董事趙海珠（Alison）已決定出嫁，婚期初步定喺兔年，相信唔少男士聽完呢個消息後都會有啲失望。
Alison嘅未來老公係行外人，話題可能唔同，但原來佢哋係同月同日出生，兩人都係九月二十五日生日，所以都係天秤座。咁講法，唔使睇兩人嘅合照，絲絲都相信佢哋好合襯。
兩人喺科大讀工商管理碩士（MBA）嗰時認識，之後日久生情成為情侶。佢哋喺去年底已經訂婚，雖然依家仲未定到結婚日期，但相信好日子會喺今年底。
Alison話，喺香港擺酒要諗好多問題，一來時間緊迫，要搵個合心水嘅結婚場地唔易，二來如果賓客太多，又怕招呼不周，冇機會同大家傾偈，所以佢哋可能會喺外國行禮，仲可以與相熟嘅親友一齊去旅行。唔知佢哋會唔會好似啲明星咁，喺拉斯維加斯註冊呢？可惜絲絲去唔到，不過都喺度祝佢哋婚後生活愉快！
余絲韻