市場熱線：中國水務短炒一轉

一月完結，係時候做賽後檢討，所謂一月效應，美股表現最好，港股先高後低但仍有得升，滬綜指則月底比月頭低17點，原來有統計話A股連續6年都係一月可以預示全年走勢，但古勝認為呢樣嘢唔使太認真。

港股月初係威係勢，在下亦以為會創新高，好彩及時認錯。好多股友虎年臨尾都「獲利回吐」，唔係自己唔小心，而係個市實在太陰濕。

米蘭站同「趴打」都就快上市，加埋理文集團（00746）計劃分拆手袋業務，一時間「手袋黨」成行成市，但3間公司分別經營零售、品牌同製造業務，概念好唔同，唔使問阿貴梗係品牌最值錢，佔利潤塊餅嘅絕大部分。

民企出事無迹尋

祖國都知自創品牌嘅重要性，但知易行難，唔係用錢就可買到，你睇依家好多體育用品股經常贊助外國球隊同運動員，但李寧（02331）一話進軍美國，股價即刻衰多兩錢重。

思嘉（01863）出盈喜，早段升逾一成，但收市仍然倒跌，呢間公司唔知發生乜事。中國森林（00930）拉閘幾日，公布係核數師發現「可能不合規情況」，民企公司呢排問題多多，中國燃氣（00384）固然大鑊，中國綠色（00904）出現產品失蹤，最弊間間出事前都無迹可尋，股友只有自求多福。

《一號文件》撐水利，十年內投資4萬億人仔，即係每年掟4,000億人仔其實唔算多，而且受益股主要係基建同水管等，但呢排冇乜板塊特別異動，難得有國策股，所以中港水股炒完又炒，香港水股包括光國（00257）、天津創環（01065）、中國水務（00855）、中國水業（01129）、天業節水（00840）、國中（00202）、北控水務（00371）同粵投（00270）等等，尋日最勁係天業節水，除咗賣東江水嘅粵投下跌之外，其餘水股都有得升。

水費長遠必調升

水股亦分供水同污水處理兩樣，以上各股大部分都係做污水處理，中國水務則主要做供水，截至舊年九月嘅中期成績表，供水賺1.85億元，佔經營溢利嘅83.6%，業績後再宣布收購江西省兩個供水項目權益。無論供水抑或污水處理，最希望係加水費，中央原本都想加水費以鼓勵節約用水，衰在依家以打擊通脹為先，乜嘢加價都唔使望住。

不過，祖國周不時都發生旱災，舊年初西南大旱，今年初北旱南凍，所以要大搞水利，但水費長遠都係要加。中國水務每年都有好多特殊盈利，但供水其實係好穩定收益來源，所以長揸冇問題，不過水股短炒有勢，可以先短跑一轉，長線則等回落再吸納。

戰報

中石化（00386）+12%

古勝於一月十四日品評過中石化後，股份一直硬淨，近日更逆市走高，較推介時低位升逾12%。

安東油服（03337）+11%

古晨趁着安東油服氣勢如虹之際於上周五作推介，股價未見回氣，若跟進兩日來都有11%落袋。

古勝