市場熱線：旺旺逆市顯強勢

全球示威騷動由南歐蔓延到北非，跟住有機會吹到中東，南亞窮國亦係高危，近日米字旗大學生又再抗議學費貴。呢個騷動浪潮都幾濕滯，一切都係緣自經濟差同通脹高，食品價格上漲搞到窮國人民捱餓，「歐豬」削減開支搞到失業率嚴重，大學生畢業後要還好多年債。依家只係開端，難怪玄學家預測兔年運勢時都話「局勢混亂」。

港股調整料有限

ADR大跌超過300點，但老古認為今日恒指跌幅應該冇咁犀利，因為港股喺老美強勢之時已跌先一步，好似上周五恒指無厘頭跌162點，短期調整應係有限，不過放假前得兩日半市，無謂亂咁博。

中海油（00883）大插近7%，但油價反彈會帶來支持；金價上周五借住地緣風險翻生，但之前由高位跌咗超過100美元認真得人驚，舊年金價狂升主要係投機因素，ETF今年減持實金，令人擔心銅價他朝君體也相同。中型內房股估唔到咁快已有反彈，重慶同上海嘅房產稅規矩多多，主要抽水對象係「多房」人士（賭王有份？）有人認為新國8條加埋房產稅，鬥地主應該可抖吓氣。

新材料股連日捱沽，思嘉（01863）半個月內股價由6蚊樓上急插到3.85元，即刻發盈喜希望止吓血。呢排發盈喜嘅股係逆市奇葩，但無論盈喜或盈警都係自願發布，又唔似A+H公司咁有較詳細嘅數字，好易成為莊家散貨或震貨嘅工具。

見外圍咁多騷亂，祖國實施食品價格管制都係迫不得已，有專家預測話今個月CPI會升到6%咁高，天氣凍加埋旱災搞到菜價升咗兩成。呢個時間揀食品飲料股都屬於盲門，但老古認為政策屬於短期性，至少飲料近期已獲准加價，老古早前已推介過滙源（01886）同統一（00220），今日二不離三再推介旺旺（00151），希望大家兔年繼續旺！

盈利表現勝同業

受原材料漲價影響，同係台資食品股嘅康師傅（00322）同統一，舊年上半年成績表已冇咁好，難得旺旺仍可多賺33.5%，不得不佩服佢嘅銷售策略。公司產品分米果、飲品同休閒食品三類，分別佔營業額23.5%、48.1%及27.3%，佢嘅產品屬於零食類別，同受價格管制嘅主糧食關係不大，公司仲將米果pack成過年送禮包裝，佢同老古之前推介嘅瑞年（02010）一樣，靠佢個大名「旺旺」而成為送禮佳品。

戰報

儀征化纖（01033）+7%

師哥上周一睇中隻儀征化纖，指其估值吸引，上周五最高見4.27元，較推介日低位足有7%進帳。

水務地產（02349）+16.1%

高仁本月十四日指水務地產業績理想，當時低位0.105元，上周五高見0.122元，累升近16.1%。

古勝