孖妹缸湖遊：黃遠輝投資講穩陣

近排孖妹成日聽到「剛愎自用」呢句成語，簡單啲解釋，即係固執己見。講真吖，固執既可以係好事，亦可以係壞事，最重要係你叫人哋唔好咁做之前，首先要警惕自己。

孖妹覺得，從事銀行界超過35年嘅黃遠輝，就係一個正面固執嘅人喇，因為佢清楚自己嘅性格與喜好，堅守個人投資立場與態度，又唔會被金錢利誘而追求無止境嘅名利，認真做到「心靈富有」比「銀行戶口富有」，孖妹都要跟佢多多學習至得。

黃：工銀亞洲董事暨副總經理 黃遠輝

當年憑直覺買股損手

祺祺：冇經歷過風浪嘅人生，就唔算真正嘅人生喇，正如每個人都會有投資失敗經驗嘅。

黃：喺一九八二年，我買咗隻股票叫做佳寧，點知3、4日之後，公司就執咗笠，今日呢張股票仲存放喺我嘅櫃桶底。當時聽人介紹，知道呢間公司做好多嘢，又做潮州酒樓，又用新方法去管理的士，所以佳寧嘅的士司機都戴手套架。有人話佢哋間酒樓菜式幾好食，又話佢哋嘅的士服務做得幾好，我基於直覺就買咗呢隻股票嘞，結果蝕咗兩個月人工。但呢個係好好嘅教訓，令我知道投資係唔可以道聽途說，同埋純粹單憑直覺及印象。

高妹：失敗係成功嘅踏腳石嘛！不過你自細住喺木屋區，好早就有家庭負擔，其後投身金錢世界，應該好熱衷投資至啱架？

黃：可能係性格關係，我自細就唔係特別恨錢。第一份工嘅人工係400蚊，七四年轉去銀行做，人工就有695蚊，但我唔會話加咗人工，就一定要諗辦法去將舊錢增值。嗰時一放假，我就走去做運動，去行山。其實我都有好多興趣，好似考古、影相、賞石、畫畫咁，如果我要去追求物質及價值，即係要去買古玩，買名畫，但我唔會咁做。

追求金錢欲望無止境

祺祺：投資就話要分散風險，你嘅興趣都咁多元化，唔通喺玩樂之中都可以悟出投資心得？

黃：我鍾意飲茶，但唔會去買啲特別嘅茶壺，屋企嘅茶壺最平50蚊，最貴可能係2,000蚊，全部都可以用嚟沖茶，如果打爛咗，我都唔會覺得可惜。好耐之前，我認識咗紫沙壺大師顧景洲，當年佢嘅茶壺賣5,000蚊，但今日全部都要賣10萬蚊以上。又例如買古玩，當你用10萬蚊買咗一件，好快你就會想買一件100萬嘅，令追求變得無止境！

高妹：嗯，你係想話人嘅欲望係無盡嘅，所以做投資抑或發展興趣都好，切忌太貪心，以免被金錢擺布自己嘅心意，脫離最初嘅投資目的。

黃：藝術係無價，而且好難決定其價值高低。如果個人要收藏名畫，邊會收集得齊呀？但我可以去買畫冊。其實珍貴美好嘅嘢，最好放喺博物館，公開畀大家欣賞，自己收埋冇意思之餘，亦只會造就欲望不斷提升。

人幣循序穩升風險低

祺祺：理論套用喺股票層面，即係話股票都有平貴之分，散戶冇可能買得晒，而且靚股應該長線投資至啱。依家人人都話買人民幣產品，我就唔信百分百冇風險嘞。

黃：只要涉及匯率，投資者就必定要承受匯價風險。由於匯價可升可跌，當人民幣真係下跌或貶值時，大家就會有損失。我認為未來人民幣升值會繼續採取循序漸進嘅步伐，每年升值幅度維持3%至5%，因為若大幅度升值，一定會打擊內地實體經濟及出口，而且任何改變都有可能帶嚟更大嘅市場投機。

高妹：不過中國經濟實力咁強，我哋都唔驚人民幣出事。

黃：其實今日大家都能夠掌握中國嘅經濟增長狀況，加上人民幣面對強大外匯儲備，匯價的確需要上升，投資風險較低。近期人民幣又可以做ODI（海外直接投資），目的係加快人民幣及企業嘅國際化步伐，而中央一直想將上海打造為國際金融中心，時間表係二○二○年，我相信到時貨幣配套以及其他軟硬件實力都冇問題，所以有理由相信到時人民幣可以全面自由兌換，甚至可以更早實行。

股海投資 量力而為

祺祺：咁你又有冇把握呢個機遇，一早儲定人民幣呀？

黃：約○六年開始，我喺銀行做咗個每日自動兌換2萬蚊人民幣嘅指令，不過依家已經停咗，因為已儲到一個目標嘅金額。至於返內地買樓，我就唔會喇，因為除咗要去睇樓之外，又要收樓、又要放租，太多程序太麻煩嘞。

高妹：有人話股票市場係一場好大嘅賭博。贏咗未必永恒；輸咗卻可能永不翻身。

黃：人生之中，我哋總會面對力有不逮嘅時刻。做得唔好，可能係因為個人力量不足，呢個係正常嘅。正如每個投資者，由於財力、經驗、可承受風險程度都有唔同，有人適合炒細價股，但有人只適合買藍籌股收息，總之凡事量力而為嘞。

67.9%散戶支持港股提前「加時」

新加坡交易所「搶閘」喺三月一日起，延長交易時段至8小時，而港交所首階段延長交易時段，就喺三月七日起加長至5小時。你認為港股要提前「加時」，與新加坡睇齊嗎？據今期《東方產經》網上民意調查，截至上周末晚上6時嘅結果顯示，67.9%人認為有需要，其餘32.1%人就認為唔需要。

高妹、祺祺

若有料報畀高妹同祺祺或有嘢問，可電郵money.biz@opg.com.hk