市場熱線：利豐醞釀大動作

老古上個禮拜推介嘅金山軟件（03888），上周五突破咗4.6元阻力，如果一見佢破位就追入嘅話，暫時已有0.25元利潤。另外隻網龍（00777）亦升6.7%，網遊股好似翻生，太平洋網絡（00543）亦創新高，反而QQ（00700）繼續獲利回吐。

網民激增網股熱炒

呢類股熱炒其中一個原因，係祖國公布網民人數舊年激增至4.57億，互聯網普及率亦升咗5.4個百分點，至34.3%，如果呢類公司嘅增長率跟得上孖屐嘅話，佢哋升得的確有道理。另一項統計最值得留意，網上購物增長率達48.4%，連帶網上支付同網上銀行嘅增長率亦超過4成。如果淘寶網想上市嘅話，肯定反應爆燈，但網購盛行亦威脅到零售業。

老古上周五已提過高速公路減收費嘅消息，但公路股遲咗一日先反映，皖通（00995）同深高速（00548）分別跌8.2%同7.5%，其實公路股一直都喜憂參半，一來車多自然對公路需求大，二來車主成日投訴公路收費貴；所以中央亦想方法解決問題，其一係向上市公司買返專營權，例如津發（00882）旗下外環線東段。

依家非國企公司已好少買公路，剛啱中國木業（00269）買條內蒙運煤公路即時爆升，但主要原因係同誠哥入股有關。今次高速公路減價消息雖然只係出自一個官員口中，但喺舊年尾中央話管制物價嘅時候，已提過要幫助物流業降低成本。如果要板塊尋寶嘅話，老古建議揀物流業，阿里巴巴（01688）個阿媽亦啱啱話掟300億人仔玩倉儲物流，衰在本港上市物流公司唔多，但可以留意邊間公司準備大搞。而利和經銷點解會畀利豐（00494）高價私有化？無非都係物流網絡值錢。

物流網絡佔盡優勢

講開利豐，雖然港股近兩日轉弱，但佢同聯通（00762）仍創下五十二周新高，利豐舊年十一月尾揩一揩50蚊即刻一支大陰燭回落到48.4元收市，但上周五創50.45元新高之後仍可收報49.85元，利豐兩次創新高其實都係恒指回落之時，反映呢隻股係親美多過親港，既然美股好似練咗不死神功咁樣，跟隻利豐亦好正路。

利豐舊年瘋狂購物，今年可以反映收購帶來嘅效益，公司並預留10億美金諗住喺祖國買嘢，包括時裝、化妝品同傢俬企業，利和經銷嘅物流網絡就係佢拓展祖國市場條命根，今年肯定仍會繼續有大動作，揸實放紙鳶可也！

戰報

北亞資源（00061）+14.4%

高仁上周五指北亞資源值得追入，當日高見1.19元，較低位1.04元升14.4%，炒即日鮮相當和味。

中銅資源（00476）+12.9%

帥哥上周五認為中銅資源短線有力再創高位，當日低位0.85元，即日曾升至0.96元，升幅12.9%。

古勝