踏入一一年，長和系成為升市領航軍，跟住大笨象（00005）、中移（00941）同騰訊（00700）「逐隻捉，逐隻郁」。李嘉誠之所以能夠成就億萬財富事業，除咗卓越商業頭腦之外，理財秘訣都唔少得。從佢嘅個人演講中歸納，可以發現超級富豪理財有三個重要意義：
一、30歲之後重視理財。20歲之前，所有嘅錢都係靠雙手勤勞換番嚟，20至30歲之間係努力賺錢同儲錢嘅時候；30歲之後，投資理財嘅重要性逐漸提高；到中年嘅時候賺錢已經唔重要，呢個時候反而係點樣管錢比較重要。
二、理財要有足夠耐心。好多人成日問：「要40年先成就億萬富翁，時間太長喇。」李嘉誠亦都曾經針對呢個問題研究出一條理財致富嘅捷徑，但結論就係：「理財必須花費長久時間，短時間係睇唔出效果嘅；一個人想要利用理財喺短時間內快速致富，係唔現實嘅。」
三、「先難後易，先苦後甜」。每年儲1.5萬元，平均投資回報率20%，只要20年，資產就可累積至261萬元。如再奮鬥20年，就可能登上億萬富翁嘅台階。當然要保證每年都有20%投資回報唔係容易嘅事（股神巴菲特都只能做到年均回報稍為超越20%），但財富累積係會有一種神奇功效。李嘉誠曾坦言，賺第二個100萬元比第一個100萬元要簡單容易得多。
兔年就快到，祝願大家掌握李嘉誠嘅終極投資秘技──一步一心一致富。
香港大學電子金融服務榮譽助理教授 徐燦傑