絲絲講場：滙豐貴客兵團委新帥
香港市場係環球銀行嘅兵家必爭之地，搞基金為普羅市民聚沙成塔咁管理財富當然不在話下，而香港有咁多富豪家族，同樣係一盤大生意，滙豐尋日就委任譚承蔭（Ronald Tham）做環球銀行顧客業務及家族理財香港區主管，實行專為富貴家族提供理財服務。
香港嘅股市亦愈嚟愈旺，滙豐同日就委任Roger de Basto出任亞太區環球銀行股本巿場交易管理主管。滙豐講到明，新任命可以強化佢哋嘅環球業務，又可以做到專注核心新興市場業務，即係又配合佢哋嗰句「環球金融，地方智慧」口號囉。
中銀林炎南四月退休
近幾年銀行界後浪推前浪嘅趨勢愈嚟愈明顯，絲絲見中銀香港（02388）出咗個通告，話由四月一日開始，中銀香港副總裁林炎南正式退休，佢個位會由中銀香港董事局秘書楊志威升任，以後楊志威就負責晒個人金融產品管理、分銷網絡及中銀信用卡國際。
余絲韻