喺○九年底，形象插水嘅高盛為挽回聲譽，宣布向小型企業「派禮物」，推出名為「10,000 Small Businesses」嘅計劃，喺未來5年斥資5億美元援助美國小型企業；高盛當然唔係派錢咁簡單，而係邀請高盛大股東、「股神」巴菲特領導顧問團隊，向企業舵手提供商業培訓，講解做生意之道，教大家點搵大錢，仲會透過地方貸款機構提供貸款。
由大名鼎鼎嘅「股神」教做生意，當然吸引唔少生意人拜師學藝，所以競爭非常激烈，有成400人報名參加。經過一年時間，已有100名企業舵手完成20星期嘅課程，約50家小型企業亦獲批貸款，高盛暫時為計劃用咗6,000萬美元。完成課程嘅舵手都大讚課程「冇得頂」，招招實用。從事傢俬業務嘅利維話，課程教識佢聯絡紐約市政府嘅採購部，得到張20萬美元定單。巴菲特話，企業家必須有協商技巧，呢個係成功要素，計劃嘅畢業生都會學識有關技巧，獲得更好嘅交易。
呢個計劃成效驕人，連華府都要表揚高盛對發展小型企業嘅貢獻。白宮資深顧問雅雷出席計劃首屆畢業典禮時話，總統首要目標係創造就業，刺激經濟增長，向小型企業提供「工具」，令政府刺激政策成效大增。
高盛就話希望幫助到餘下9,800位企業家，不過得番4年時間，受惠嘅人可能唔係太多，絲絲就建議華府唔好得個讚字，不如向高盛偷吓師，複製呢個計劃，等多啲平民受惠啦。
余絲韻