絲絲講場：新創建專刊拜年 彤叔兩乖孫送祝福
仲有兩個禮拜就係農曆新年，一眾新創建（00659）管理層透過集團刊物，向大家送上新年祝福，當中梗係唔少得新世界發展（00017）主席鄭裕彤嘅兩位內、外孫鄭志明及杜家駒啦！
身為「彤叔」乖孫、鄭家純次子嘅鄭志明，佢嘅兔年願望除咗「公司業績年年進步」外，就係「每位同事都有人工加」！佢仲話希望喺新一年喺工作及生意範疇上再學多啲嘢。至於彤叔外孫杜家駒，佢除咗希望身體健康之外，仲希望子女喺新一年「讀書聰明伶俐」。
鄭志明入民豐惹遐想
剛獲股東通過收購廖氏集團23%股權嘅民豐（00279），日前宣布委任鄭志明及廖烈武兒子廖金輝為公司非執行董事，呢單嘢都幾引人遐想，因早前有報道話入股民豐嘅機構投資者VMS Investment及VMS Capital，與新世界有密切關係，已令市場猜測新世界係唔係藉民豐曲線收購廖創興企業（00194）及創興銀行（01111）權益，雖然最後新世界發言人澄清冇咁嘅事，話集團並冇入股民豐，而VMS只係協助新創建打理旗下策略投資嘅基金管理公司，不過如今鄭志明做埋民豐非執行董事，市場人士可能又會有好多古仔講喇！
余絲韻