絲絲講場：麥博士謀攻對沖基金
對沖基金潮流席捲各地，就連一向做開長倉基金、有「新興市場之父」之稱嘅鄧普頓資產管理新興國家投資團隊執行主席麥博士（J.Mark Mobius），都傳出話佢有興趣成立對沖基金，呢個市場真係愈嚟愈熱鬧。
麥博士喺基金界享負盛名，依家管理緊全球超過400億美元嘅資產。尋日有外國通訊社向佢求證，佢承認正考慮設立對沖基金，但由於計劃未落實，所以未透露詳情。唔知係咪仲有啲細節未搞掂，絲絲問佢哋嘅發言人，佢話現階段未有確實嘅計劃，但佢哋一向都會開拓新嘅投資機會，以應付客戶需求。依家市場需求正正係呢啲投資進取、回報高嘅對沖基金，絲絲斷估由麥博士主理嘅對沖基金，可能喺不久將來就會同大家見面。
港市場壯大兵家必爭
對沖基金規模不斷壯大，市場估計亞洲（日本除外）嘅對沖基金規模會由依家約1,100億美元，攀升到年底嘅1,400億美元。香港係對沖基金嘅兵家必爭之地，好似高盛炒房「一哥」施家文都會嚟香港搵食，成立一隻規模逾10億美元嘅對沖基金，再加埋最近好多消息都係關於對沖基金點樣駐重兵喺香港，呢啲活動一度觸動內地監管機構嘅神經。絲絲相信以麥博士嘅號召力，佢嘅對沖基金規模應該拍得住施家文嘅基金。
點解連投資大師都爭住搞對沖基金？有分析話係因為收費和味，傳統基金嘅管理年費最低係0.3%以下，但對沖基金就高到有2%，而且仲收埋20%表現費，難怪大師們都要分一杯羹。
余絲韻