市場熱線：統一係時候收集

滬綜指呢兩日走勢同港股一樣，股指期貨今日結算，滬綜指自從舊年十月以來第一次收市跌穿2,700點，睇圖表如果日內上唔返就大劑。

花旗、高盛、富國等美國錢莊成績表全部嚇親人，尋晚會輪到大摩。老美一直靠金融同科技「兩條腿走路」，依家要側埋一邊。

中美和氣生財，老美見到450億美金嘅大生意自然見錢開眼，中國幫波音買飛機已係例牌菜，古勝講過對飛機股未必係好事。

春運前日展開，內地股民循例炒吓鐵路股，而中鐵建（01186）陪胡總去美國獲投桃報李，尋日停牌應該有好消息公布，但點解中國中鐵（00390）冇份咁大細超？皆因中鐵建喺沙特項目蝕大本係有政治任務（當然冇人會證實），成語話「收之桑榆」就係咁解。

推動物流 公路「輸蝕」

另外，祖國有消息話為推動物流業，故要高速公路減價，補償方法係拖長公路經營權至30年之後，以長線補助短線，孖屐梗係唔高興。飛機、鐵路、公路難免有競爭，鐵路肯定當時得令，如果鐵路貨運可解決樽頸問題，公路危矣！

在下話過天大（00839）同珠管（01938）都公布定單回升，冇理由勝利管道（01080）會特別衰o架？尋日即公布中標中緬油氣管道項目，逆市升咗4.6%。中天（02379）前日升咗3倍半之後，尋日又升7成，有讀者話見前日股價除淨大幅高開都冇人沽貨，睇唔過眼打電話去監管機構投訴，結果證監會將個波踢去港交所（00388），然後港交所又將個波踢畀證監會，谷氣之餘打來報館搵我哋反映。在下希望呢位讀者睇開啲，「交波」呢樣嘢係自古官場智慧，「干預自由市場」更係碰不得！

尋日古勝話過內需股捱沽，但所謂爛船都有三斤釘，何況呢條絕唔係爛船！在下就儲定彈藥準備50蚊買恒安（01044）；飲品股亦都好弱，統一（00220）由6蚊跌到最低4.1元，但已有見底感覺，尋日逆市彈到4.5元收市。中央雖然話要管制食品價格，但果汁、汽水、啤酒樣樣都頂唔住成本壓力要加價，飲品話晒唔係非飲不可，唔同食品睇得咁緊。

提供長揸入市機會

雖然飲品加價係為咗抵銷成本上升，甚至未必足夠抵銷，但有得加總好過冇得加。飲品股呢次調整亦係畀長線投資者低位買貨嘅機會，行業又可汰弱留強，所以古勝認為統一依家已跌到吸引水平，可以部署低位吸納呢類內需股。通脹初時唔習慣係人之常情，但同九十年代比只係小兒科，價格管制只係暫時止咳，加息點都係有效得多。

戰報

中海化學（03983）+10%

帥哥周一認為中海化學可受惠中央扶農政策支持，昨曾升至6.88元，較推介日低位升逾10%。

中電信Call（25038）+66%

Handsome哥於上周三揀隻國信德銀購25038，昨高見0.345元，以推介低位計勁升逾66%。

古勝