貿發局有份搞嘅「亞洲金融論壇」尋日完結。絲絲去足兩日，見到好多財金界猛人，嗰度仲有好多唔同嘅工作坊，搭埋平台等啲與會者可互相配對，製造多啲商機。其中一個絲絲幾感興趣嘅，係由日本經濟產業省（METI）及日本貿易振興機構（JETRO）搞嘅工作坊，介紹點樣透過日本創業及私募基金投資日本公司。
日本經濟迷失咗超過十年，真係要快啲醒番先至有競爭力。日本首相菅直人去年首份施政演說確立「新增長戰略」，JETRO亦趁勢首次率領日本金融企業代表團來港參加呢個論壇，共47人嘅代表團會去香港及中東（沙特阿拉伯及巴林）拓展人脈商網，積極吸引外商投資日本。
不過依家日圓仲係好貴，變相加重投資成本，JETRO香港所長鈴木實亦講出日本企業嘅困難，佢話日企對投資仲係相當保守，從而令日本高質素、高科技嘅中小企業面臨融資困境，所以希望借助金融論壇吸引香港及全球資金，造就兩方機遇。JETRO係日本官方機構，佢哋嘅睇法應該幾有代表性。
（余絲韻）