每逢年尾，樂壇都有多個頒獎禮頒發獎項畀歌手作鼓勵，最後仲有個傳媒大獎，頒畀每年攞獎最多嘅歌手，如果商界有個類似樂壇嘅傳媒大獎，絲絲諗今年睇怕要頒畀中電信（00728）。事關中電信喺《Euromoney》最新年度亞洲最佳管理公司評選中又連掃多個獎，當中最架勢莫過於再次獲選為「亞洲最佳管理公司第一名」，唔單只擊敗亞洲其他對手，更成為第一家公司連續兩年獲得呢項榮譽。
《Euromoney》話，中電信能夠再次囊括多個獎項，主要因為佢哋有清晰兼具有說服力嘅長遠發展戰略，而負責投票嘅分析員就讚揚中電信透明度高、對外溝通良好，中電信亦專登送咗批雪茄及朱古力畀分析員以答謝支持。
自從蘋果公司推出CDMA版iPhone以來，市場就憧憬中電信遲早會引入C版iPhone，佢哋嘅股價亦係咁升，唔知中電信攞住呢批獎與蘋果公司傾談引入C版iPhone，會唔會Fight到個筍價呢？
（余絲韻）