內地發展商SOHO中國（00410）一向都話注重生活品味嘅人群，提供創新生活空間，但估唔到佢哋喺北京長安街一個名為「建外SOHO」嘅項目，就畀內地著名演員宋丹丹喺微博大彈「難看極了」，佢仲「懇求」SOHO中國老闆潘石屹唔好再起樓，咪再破壞北京嘅景色。
據絲絲了解，SOHO中國呢個項目位於北京國貿中心正南面，由日本著名設計師山本理顯設計，係目前CBD中面積最大嘅建築項目，總佔地16.9公頃。作為北京人民藝術劇院嘅國家一級話劇演員兼影視演員宋丹丹喺微博內形容，每次經過嗰度都有一種快到更年期嘅感覺，又話潘石屹應該對北京有番啲責任感。嘩！睇嚟真係令佢好辛苦喎！
畀人講到個樓盤咁不堪入目，潘石屹就喺微博回應話建築係大眾嘅藝術，仲話歡迎各位朋友批判及點評。
佢哋最近又將另一個作品「望京SOHO」嘅模型上載咗，都引嚟唔少網民嘅批評聲音，例如「不好看，像史前動物」、「這是在我們的地球上嗎？」其實係咪咁難睇，絲絲相信大家自有分數啦！
（余絲韻）