滙控（00005）集團新任主席及行政總裁（CEO）已分別喺去年十二月三日及今年一月一日正式上場，兩位「獅王」上任後首次外訪，係於上周四北上到京「朝聖」，拜會國務院副總理王岐山，佢哋喺本周終於回歸香江，首次喺香港主持集團管理委員會會議。
亞洲係獅子集團盈利貢獻最大嘅地區，因此集團行政總裁辦公室早已由去年開始設於香港。集團行政總裁歐智華上場雖然唔夠三個星期，不過香港對佢嚟講應該唔陌生，事關九四年佢由日本調嚟香港，喺呢度生活咗差唔多十年，至○三年初先調番倫敦。
首度以行政總裁身份登場，歐智華亦不忘講句：「亞洲係滙豐業務策略上最重要嘅市場……」歐智華除咗第一次以行政總裁身份正式主持會議，喺本周稍後時間，佢亦首次以CEO身份出席集團主席范智廉喺香江主持嘅董事會會議，唔知「范歐配」到時有乜嘢新火花擦出呢？
（余絲韻）