瑞銀嘅「賓卡」有好消息，佢哋返工有望可以着番紅色「底底」、搽黑色指甲油同埋食洋葱、蒜頭喇！點解咁講？事緣瑞銀喺上月頒布咗一份44頁厚嘅「員工衣着守則」，唔單只衫褲鞋襪，仲有內衣、指甲、耳環、眼鏡、留鬚以及食乜嘢都管一餐，呢本「訓導手冊」一曝光，畀全球行家笑到收唔到聲，搞到瑞銀前日尷尷尬尬咁話考慮執吓啲規條。
瑞銀發言人克恩話，之所以咁長氣提醒班員工穿着得體啲，儀容檢點啲，都係想提升番瑞士「賓卡」嘅專業形象啫！長遠嚟講對瑞銀形象有好處，依家諗住只係要求前線員工着番公司指定顏色黑、白、紅，即係男職員着黑西裝褸、白恤衫、打紅呔冇走雞。
話就話唔再管得咁緊，但佢哋份員工守則內有唔少規條，連絲絲都覺得過咗火。上次提過「大口氣」源頭嘅洋葱、蒜頭唔准食，女職員要着肉色內衣，男嘅唔畀穿卡通襪，3日要剃一次鬚，同埋1個月恤一次髮，其實仲有好多奇怪規條未講晒，例如眼鏡要常清潔；要戴腕錶畀人守時可靠嘅感覺；女士要常修腳甲，令對絲襪襟着啲，最好隨身帶多一對做「士啤」。
呢本「訓導手冊」更因應唔同國家嘅文化而設，例如喺俄羅斯做緊嘢嗰陣，點都要揸住杯嘢嚟飲，同埋唔好拒絕去歎桑拿嘅邀請；喺美國就千祈唔好批評總統。
（余絲韻）