市場熱線：昆侖能源保持強勢

古勝尋日先講過和黃（00013），不過唔係拆零售而係拆碼頭，唔喺香港上市而喺星洲，睇怕分拆仍會陸續有來，誠哥前排不斷增持長實（00001）真係信者得救。之但係，長和「雙天保至尊」咗咁耐，尋日齊齊趁好消息出貨，結果下晝拖低咗個市。

個小QFII舊年只聞樓梯響，但今次高官開金口證實，應該唔會再甩拖。隻國泰君安（01788）拿拿臨炒上，不過飲頭啖湯發人仔基金嘅海通（00665）只係升2.56%。

小QFII限住8成要買債，當然吸引力高過買香港發行嘅低息人債，但祖國今年係加息周期，而遲啲又有人仔REITs爭食，所以未必會好受歡迎。

美股尋晚復市，孖屐睇實蘋果公司股價同成績表，執筆時道指期貨升ing，納指期貨跌ing，個揸fit人請吓病假，班股東都會陪佢一齊病，新上市嘅德銀輪（10033）尋日狂跌27.5%，連帶同佢憂戚與共嘅瑞聲（02018）亦跌3.34%，但同索尼愛立信合作生意嘅南京熊貓（00553）就升7%，一間公司獨大對市場從來都唔係好事。

二三線續炒個別

尋日開始招股嘅寶峰（01121）反應都算唔錯，有人認為佢係大半隻OEM股，唔值20倍以上PE，睇好孩子（01086）上市後即謝晒。不過，古勝睇過佢公司網頁，佢嘅產品其實係女士涼鞋，款式幾新穎時尚，唔係屋企拖鞋或人仔膠拖，內銷概念應該幾強。

其實呢排啲二三線股仍然係冇乜氣勢，淨係得誠哥入股嘅中國木業（00269）表現似樣，尋日升跌股數都係一半半，最強係濠賭股，有5隻創咗新高。燃氣股近排算唔錯，港華燃氣（01083）創新高，昆侖能源（00135）上升4%，新奧（02688）仍然保持硬淨，舊年下半年呢類股太落後（皆因天然氣加價25%），今年轉弱為強亦屬正路。

當中昆能走勢值得留意，向阿媽中石油（00857）收購北京燃氣60%之後，有獲利回吐係好正路，但隻股調整唔夠一成，尋日又升穿下降軌，證明低位好有承接力。

放長線等釣大魚

公司呢單收購約13倍PE，抵過北控（00392）早年收購北燃40%股權；另外，值得留意嘅係今次收購係發新股畀中石油，而唔係用石油資產去交換，氣換油本來可以加快昆能變身嘅過程，但點解中石油要股票、唔要石油呢？

昆能的上升動力始終要靠注資，可以肯定仲未完，只差在要等幾耐，班股東等咗大半年，平均回報約兩成，炒家或者嫌奀，但古勝認為，低風險嘅公司有咁嘅回報已經令人滿意，所以建議繼續揸實放長線釣大魚。

戰報

中國全通（00633）+12%

詩詩尋日認為全通值得跟進，果然再度發力，昨一度升至3.14元，較低位2.8元，單日升12.1%。

中國木業（00269）+24%

葉心尋日認為中國木業屬抵買之選，果然昨日高見0.51元，飆升近24.4%，炒即日鮮相當和味。

古勝