上周二講24,000點破關在即，一轉眼好似RubberBand隻歌咁《一轉身卻天亮了》，24,000點同大家say哈囉，一早都講炒股唔炒市，上星期五騰訊（00700）同長實（00001）領航上升，不過指數只係升咗44點，又一例證是也，各位多加留意。
近排因緣際遇，認識一位股壇名女CC鍾，CC稱得上係「股俠」──英雄俠義，對股市睇法見解獨到，放棄高薪厚職，以自由撰稿人為讀者暢所欲言，確為股民之福。CC分析有據，值得追蹤，走去佢個blog行咗一個圈，見到有隻股正正係今日想寫嘅政策股，佢就係湖南有色（02626）。
今年講過內需同「十二五」係重點，湖南有色都跌咗入「十二五」監察之列，原因係因為有色金屬嘅大方向已向阿爺上提，未來五年，對一眾金屬股，例如銅、鋁……等十幾種，但同生活有關嘅金屬進行產量控制，阿爺話要提升產品附加值同強化下游加工產業咁話。
如果咁樣講，成個行業會進行「結構性改組」，即係強者愈強，弱者愈弱的新局面。加上稀有金屬成為近期資源礦產性感話題，有排玩。
唔好唔記得，湖南有色阿媽叫五礦，阿媽錫仔係「天經地義，愛是不保留」，喺呢種情況下，母子嘅一體化關係更加成為呢場奧斯卡嘅高潮位，根據CC分析話頭，如果阿爺畀湖南有色一成資產，折合為每股約6.42元。股價一倍回報，母子同心又一例證。繼續追蹤！
香港大學電子金融服務榮譽助理教授 徐燦傑