有「中國亞馬遜」之稱嘅當當網，去年底喺美國上市首日股價狂漲87%成為佳話，不過喺風光背後，CEO李國慶似乎滿肚冤屈，佢有感而發以「虛構」嘅搖滾歌詞「自揭傷疤」，為有意赴美上市嘅創業者進行「警示」，此舉更被有心人解讀為「李國慶對保薦人嘅估值不滿」，並引發與網友嘅一場罵戰！
李國慶呢首搖滾歌詞大意係話投行為獲生意，當初向公司話會估值10億至60億美元，但到正式準備招股書時就將估值降到7億至8億美元，就算明知開盤後公司估值會達20億美元，最終定價都只願以12億元作準。雖然隻歌冇點名話批評邊個，不過個Blog一發帖，好快就有自稱喺摩根士丹利任職嘅女網民作出反駁，與李國慶進行罵戰，雙方用詞都非常唔客氣，以內地用語嚟講更係「很黃很暴力」。當當網尋日出咗聲明，話歌詞只係李國慶嘅虛構創作，大摩尋日亦發咗澄清聲明，話該女網民並非佢哋員工。
事件引嚟網民討論，唔少人更對李國慶表示同情與支持，當當網話李國慶嘅歌詞只係「虛構創作」，其原意係「自揭傷疤」，歌詞亦非針對任何企業或個人，而李國慶喺自己嘅微博亦話正就創作中嘅「髒話」向董事會「寫檢查」、又話自己無意就投行改革問題接受採訪。
余絲韻