絲絲講場：柳傳志：瞎子揹跛子走
大陸成日話錢太多，資金同埋企業發展都要「走出去」，咁香港扮演乜嘢角色？聯想（00992）主席柳傳志就妙喻兩者好似「瞎子揹着跛子走」，內地係身體健壯嘅瞎子，香港就係幫瞎子指明路向嘅跛子，佢話兩者之間最緊要互信。
內企走出去靠港指路
中國企業近年到處Shopping，大灑金錢購併，講到「走出去」買嘢，聯想收購IBM單「刁」都算係最經典。尋日柳傳志出席亞洲金融論壇時，就被主持人亦即係恒隆（00101）主席陳啟宗（Ronnie）問到，若然再嚟多一次，會唔會再收購IBM？
柳傳志就時光倒流，話當時收購問過自己好多問題，例如IBM點解要賣盤？買咗自己點令佢有盈利？結果依家兩間公司嘅磨合算係完成咗，而聯想嘅市佔額亦升咗好多，算係好成功嘅購併。佢總結話，香港喺內地公司做購併時，兩者就好似「瞎子揹着跛子走」，內地企業年輕力壯，但係睇唔清前路，香港呢位跛子就負責點明前路。佢話就好似當年購併咁，雖然聘請咗財務顧問，但自己仲係十五十六，心諗財務顧問梗係想單「刁」成事啦！所以若然香港可以與內地企業培養互信，然後再憑住自己嘅知識帶內地企業走出去，咁就Perfect啦!
柳傳志與Ronnie愈傾愈興起，話最好兩個人都可以歎住紅酒培養互信，然後一齊做生意，Ronnie聽完即刻大笑話好！
余絲韻