市場熱線：華耐蓄勢闖高峰

存款準備金率加一、兩次大家唔多覺，但累積起來就會造成好大傷害。好彩港股相對硬淨得多，恒指全日跌126點，期指唔知點解高水58點（美股尋晚冇市），但國指就受A股影響較大，跌幅達1.63%，成交得709億元，沽壓唔算大，但牛熊證偏埋一邊押晒喺「熊」度。

和黃「紅底股」在望

個市又係升長和的確幾悶，其他地主股同收租股都唔錯，本港樓市已經升穿額外印花稅實施前個位，下一個就挑戰九七新高。另外，和黃（00013）會唔會成為「紅底股」，關於佢分拆零售業務嘅消息流傳咗好耐，要分拆當然萬事俱備，但和黃咁多年奉行「大即是美」宗旨，如果要拆真係有排拆。

舊年下半年開始，本地零售掂過碌蔗，同胞由買貴價嘢搶到依家掃日常用品，大昌行（01828）都組內地團來港辦年貨，屈臣氏話會喺祖國開千間分店，睇吓邊間公司可以搶佔先機。

老美呢排歌舞昇平，今個禮拜幾件巨無霸派成績表已開定香檳，唯一話擔心嘅係冇咗3條A評級，但狗咬主人係好少見。孖屐關注胡總今日訪問美國，其實都冇乜好講，人仔已自動自覺升值，美國又唔慌會放寬高科技產品出口畀你，但祖國領導人嘅最佳手信係幫襯波音買飛機。

不過，對飛機股未必係好事，雖然乘客數目年年上升，但載客率仍係麻麻，而高鐵嘅威脅愈來愈大。

古勝話龍昌（00348）頂實3毫子唔知有乜後着，轉頭已升到4毫子。天大油管（00839）公布上季銷售按年急升83%，珠江鋼管（01938）公布上季定單按季升45%，兩隻股價都翻身，剩低隻勝利管道（01080）冇乜起色，大家都做油管，冇理由差咁遠啫！

條拉鏈（02011）一話西京增持即急升26.5%，半新股話升就升，最主要係貨源歸邊，華耐（01020）、鐵貨（01029）、MI能源（01555）、中國聯塑（02128）尋日都創咗新高，睇吓你夠唔夠膽追。

以華耐為例，舊年七月以每股0.76元招股，尋日已升到1.85元，即係升咗1.43倍，佢做鋼水控流產品亦屬冷門，但計一○年全面攤薄預測PE約12倍又好似未算貴。

擴充產能做一哥

當然，有「金手指」惠理睇起變咗生招牌，公司依家市佔率19%排第二，華耐間新廠房會喺今年下半年落成，明年初投入使用，屆時產能將由8,200噸倍增至16,800噸，高過一哥維蘇威，亦擴闊產品品種。

華耐咁有信心將產能倍升，到時能唔能夠賺double暫時有保留，但隻股呢排咁強勢，值得搭吓順風車走一轉。

戰報

佳華百貨（00602）+70%

古晨本月四日推介佳華，當日最低位0.59元，其後反覆上揚，昨日高見1.01元，累升超過七成。

第一視頻（00082）+7%

股博士上周三睇中第一視頻，可短線投機，昨日最高見2.76元，較推介日低位2.58元升近7%。

古勝