市場熱線：滙源果汁加價有理

其實，好淡之爭冇乜意思，好友永遠當壞消息係耳邊風，人哋散貨當震倉；淡友則覺得遲早世界末日，繁榮只係假象。老古則自認係大戶嘅跟尾狗，暫時都會維持睇好嘅方向。歐元由1.28回升到1.34好似眨眼咁快，孖屐氣氛要變就變，想穩陣買人仔啦！

長實跑贏地產股

坡佬嘅「短炒印花稅」懲罰仲辣過香港好多，睇落香港變咗小兒科，既然港府嘅「狠招」已證實冇料到，財政預算如無意外又會有新招，所以呢排地主股都腳震震，淨得超人旗艦（00001）不斷創新高。超人隻人仔REIT未上市先轟動，既享高息又享人仔升值喎！

奧思知（08325）同泰潤（00204）易手都大升，中國木業（00269）亦大手筆買咗條內蒙運煤公路，但奇在分兩批批股，批畀不知名人士嗰小批只係每股3毫子，大批畀超人基金同中國人壽信託嘅卻每股4毫子，超人要溢價攞貨確係少有，中木復牌股價亦相當波動。

QQ（00700）卒之過咗200蚊，○九年佢同比亞迪（01211）都係神仙股，但如果一樣揸到依家，感受就差天共地。行業因素係其中之一，但壟斷因素更重要；你做一種高度競爭行業（例如零售），PE高極有限；但你係獨市或寡頭壟斷就完全唔同，可樂點解要用200億買滙源（01886）？皆因唔係果汁咁簡單，到時可以綑綁式賣埋其他產品。

結果，可樂買唔成滙源，滙源反而出汽水反攻可樂，從來冇公司喺汽水市場撼得郁可樂同百事，滙源都算夠膽。與此同時，公司亦進軍飲用水市場，希望用品牌優勢，好似康師傅（00322）同娃哈哈咁做大做強。

其實，自從可樂收購失敗之後，間公司好似喺股民眼中消失咗一樣，長期喺5蚊至6蚊之間浮沉，但最近因為祖國各類飲品相繼宣布加價，滙源又值得留意。

成本結構佔優勢

雖然飲品加價，但好多飲品商其實冇着數，因為成本升幅仲犀利，所以你睇康師傅、中國食品（00506）、青啤（00168）嘅股價都好疲弱。不過，滙源就唔同，因為佢自己有果園、果汁加工廠等上游業務，成本結構佔好大優勢。當然，糖同膠樽呢類成本上升冇得傾，但加價對佢來講始終係好事。

舊年七月，有私募基金以每股6蚊接咗達能手上批貨，大股東朱新禮亦行使部分CB以每股5.1元換股，隻股靜咗咁耐，等嘅係全年業績能否轉虧為盈，但前途肯定光明，唔怕坐貨的話勝算好大。

戰報

鐵江現貨（01029）+16%

桃桃上周五話鐵江有力創新高，股份即日落鑊，最高升見1.86元，較低位1.6元升逾16%。

順誠控股（00531）+9%

古晨又有好介紹，上周四推介順誠，周五升至最高1.89元，較推介日低位1.73元，累升逾9%。

古勝