莊士中國（00298）尋日公布委任莊家彬（Albert）做副主席，即日生效，每年董事袍金兩萬蚊，相當克己。Albert依家已係莊士嘅執董，做副主席即係升咗職。
Albert係莊士機構主席莊紹綏之子，年紀輕輕只有30歲，喺物業業務及企業管理方面累積6年經驗。主修經濟嘅佢，之前已經為莊士嘅業務發展亮相過好多次，表現唔錯，幾有大將之風。佢一直都係公司執行董事，亦係莊士機構（00367）執行董事及首席營運總裁，此外亦係勤達（01172）執行董事，公司通告披露佢揸住莊士機構106萬股股份，以尋日收市價1.17元計，市值約187萬元。
絲絲早前見過Albert，佢話打算去日本滑雪，為咗添置新嘅滑雪裝備，喺試眼罩期間，唔小心畀眼罩掛住嘅廣告紙牌刮損右邊臉，不過呢啲小意外唔會影響佢嘅度假心情。佢話喺美國讀大學時已開始滑雪，滑雪年資超過10年，都係高手喎。
余絲韻