絲絲每次過完年後開工，最開心當然係有人工加兼收到開工利是，尋日與恒生銀行（00011）嘅老友食飯時講開，恒生業績一年好過一年，今年加人工實冇托手㬹啦，老友話加人工要睇員工表現，但開工利是就肯定有得加。咁究竟加幾多呢？老友話聽聞會由以往嘅十蚊加到廿蚊！都好吖，起碼加幅跑贏通脹好多啦！
據老友講，恒生與好多機構一樣，無論你做到乜嘢階層都一視同仁，總經理與清潔阿姐大家都攞到相同數額嘅開工利是。老友仲話今年加到廿蚊，證明都幾好景，不過十蚊、廿蚊都好，志在攞個好意頭啫，反而盡力做好手頭工作，希望加多啲人工仲實際。
據○九年度嘅年報資料，恒生共有9,343個員工，比對上一年少咗4.3%，與工作效率好咗有啲關係，佢哋控制成本得宜，好值得股東讚許，如果真係將開工利是加到廿蚊，股東唔會有異議嘅，員工又開心，皆大歡喜。
余絲韻