絲絲講場：恒大當旺女排六連勝
雖然中央去年多次出招打壓內地樓市，內地發展商恒大地產（03333）嘅生意成績依然相當理想，老闆許家印自然開心，但其實除咗公司成績表靚之外，許家印嘅球隊喺體育界嘅成績亦好掂，佢隊廣東恒大女排最近就喺中國女子排球聯賽連贏6場，可謂雙喜臨門！
恒大女排有好成績固然開心，不過梗係唔可以咁就滿足，許家印向絲絲講，球隊之前已經升班為甲級喇，所以嚟緊目標係希望可以打入三甲。
旗下足球隊踢賀歲盃
其實唔單只排球，鍾意體育嘅許家印仲有隊足球隊叫廣州恒大，喺嚟緊農曆年初一及年初四，呢隊中超升班馬就會嚟香港與南華踢賀歲盃，不過許家印就話到時唔可以親自打氣，絲絲聽老友講，因為佢新年要留喺內地過節。
余絲韻