曾代表兒童基金（TCI）加入領匯（00823）出任非執行董事嘅何志安（John Ho），早前離開TCI自立開戶，成立對沖基金Janchor Partners Pan Asian Fund，成立首年就以35%回報成為去年其中一隻最賺錢嘅對沖基金，有咁好嘅成績，投資者梗係排住隊認購，不過大家唔好以為呢位只有34歲嘅「神奇小子」係來者不拒，佢講到明Janchor Partners收客只揀長線投資者，資金鎖定期只有一年嘅就一律免問喇！
以Eurekahedge嘅亞洲區對沖基金數據，去年嘅回報平均唔夠8%，亦即係話Janchor Partners嘅回報表現較市場平均跑贏4倍有多，與去年一月Janchor Partners啟動初期只有4,000萬美元規模比較，基金依家嘅資產規模已增至5億美元，資產規模成長原來亦係基金要被迫揀客嘅原因。
據《彭博》引述何志安嘅解釋，Janchor Partners Pan Asian Fund成立初期為咗吸引投資者認購，已講明當基金規模增至5億美元，就會免收管理費，資金鎖定期較長嘅就會獲折扣優惠，亦即係話當基金規模增至5億美元後，基金嘅管理費收入會隨年期下降，所以基金必須以更保守嘅態度募資，收客只會揀長線投資者。
既然條數咁計，投資者當然樂於做長期客仔，據講基金嘅70%資產已承諾3年投資期，咁就可免受市場短線波動，限制投資部署。基金中約65%嘅資金已用作買入看升嘅股份，約30%會進行沽空。
據何志安話，約48%已買入嘅股份過去一年價值升48%，為基金帶嚟75%嘅貢獻。
余絲韻