市場熱線：中海油穩步上揚

美股同港股有獲利回吐亦係正常，但A股確係樣衰，滬綜指尋日跌1.66%，而且穿埋2,800點關口，即係仲低過舊年尾收市價，聽講話A股一月水晶球效應好靈，連續6年睇一月升跌就知全年係點，準確程度同八爪魚「保羅」有得揮。當然，一月只過咗三分一，後市仲有好多變數。

細價股繼續活躍

港股尋日成交衝破800億元，但扣咗太保（02601）上板嘅140億銀之後，其實成交縮咗。藍籌冇乜特別，預咗資源股受壓，和黃（00013）繼續強，古勝亦話咗內房股要計數，咁啱重慶落實要收房產稅，升咗成個禮拜嘅內房股有回吐；不過，古勝估錯咗民行（01988），低價批A股之後復牌竟然升超過2%，但太保畀凱雷再減持之後卒之頂唔住。

細價股反而好活躍，呢排大上大落嘅股好似龍新能源（00395）、時富金融（00510）、安芯（01149）同志高（00449）等，尋日齊齊重上升幅榜，大股冇得炒就轉炒細股。

新股除咗配售形式上市嘅中國新經濟（00080）之外，今日嘅森寶（01089）係今年第一隻以公開發售形式上市嘅新股，雖然賣雞唔算特別概念，而且祖國實施緊食品價格管制同埋德國雞出事，但呢隻勝在細細粒容易炒，如果市靜更啱「合尺」。

中糧包裝（00906）周末請咗班記者去杭州，但股民其實關注嘅係紅罐王老吉會唔會重投廣藥（00874）懷抱，中糧包裝只係被動角色；而廣藥繼續大上大落，不過今次炒嘅係乙型肝炎疫苗概念，藥股呢輪得廣藥同康哲（00867）有睇頭，同零售股一樣冇厘鑊氣，建築股衰在市值太細，揀股愈來愈蝦人，唔同舊年揀定一個行業就可以炒足幾個月。

油價具上升空間

國際油價雖然上周五下跌，但喺尋日亞洲時段升返0.65美元，中海油（00883）亦逆市升1.3%，仍然係沿住一條好靚嘅上升軌慢慢升，買佢除咗睇油價繼續升之外，主要係睇佢今年會大量增產，所以佢個姐妺中海油服（02883）亦相當強勁。

中海油舊年已做咗藍籌股王，今年斷估唔會冧莊，除非油價重上○八年水平啦，但升到每桶100美元難度唔大，佢股價估計今年仍可以平穩上升。

中海油母公司個傅老總前排喺北京見香港記者，豪言話未來5年會掟1萬億人仔喺海外建設一個新「海上大慶油田」，雖然呢個數字係母子加埋，但中海油本身市值亦只係8,300億元，個投資額的確幾嚇人，而產量亦會由舊年嘅5,000萬噸油當量，至二○二○年有望達到1.5億噸油當量。

戰報

漢傳媒（00491）+13%

古晨尋日建議短炒漢傳媒，在宣布收購老撾再生能源刺激下，以低位0.225元計，單日升13%。

紛美包裝（00468）+11%

帥哥上周一指紛美包裝隨時有突破，當日低位5.15元，昨日創5.76元上市新高，累升11.8%。

古勝