港股繼周一大升400點後，尋日再升232點，成交仲上番700億元水平，市場人氣明顯有改善。
內地公布經濟數據遜預期，市場解讀為內地加息步伐可望放緩，一眾之前受內地加息威脅嘅板塊，都有不俗表現，內房股為其中之一。
佳兆業（01638）去年十一月以來，股價持續向上，表現較不少內房同業為佳。集團剛宣布，截至去年十二月二十九日，全年累計實現銷售面積為86.73萬平方米，同比增長26.8%，銷售收入更突破百億大關，至101.04億元，同比增長67.1%。另外，集團大股東亦不斷增持，在上月中以均價2.3元，合共增持咗6,651.3萬股，即係話用咗成1.53億元，咁大手筆，可見相當睇好公司前景。
佳兆業股價去年十一月由1.6元水平升至最高2.5元，之後回落調整，昨日升3.4%，報2.38元，同大股東增持價位相距不遠，現水平真係唔怕買，目標2.8元，止蝕2.2元。
詩詩