藝術有價！主要從事度假村及物業發展嘅實力建業（00519），尋日公布咗一項須予披露嘅出售資產交易，呢項資產並唔係物業或廠房，而係一幅國畫，更重要嘅係，實力建業呢次出售竟然帳面大賺36倍！
根據公司披露，佢哋尋日喺佳士得安排嘅公開拍賣中，被買方確認買入由佢哋持有嘅國畫，呢幅國畫來頭絕對唔小，乃係出自中國著名畫家徐悲鴻手筆嘅《雙豬圖》，呢幅《雙豬圖》係實力建業旗下嘅實力電子喺一九九八年以34.5萬元購入（當年報章都有報道），經過12年多嘅收藏，竟然可以1,300萬元作價售出，回報超過36倍。呢幅《雙豬圖》去年六月時喺公司嘅帳面淨值只約28萬元，扣除相關佣金及開支，實力建業估計今次出售嘅收益約1,200萬元，銷售所得款項將用作集團營運資金。
至於買家姓甚名誰，根據拍賣條件，買方身份係唔可以向公眾披露。絲絲記得，實力建業喺上月先至宣布，以代價1,750萬元間接出售深圳市龍崗區平湖物業，估計出售虧損767萬元，賣畫好賺過賣樓，真係唔知呢個係乜嘢世界？
余絲韻