滙豐中國董事長鄭海泉自從去年向公司請咗病假後，好耐都冇喺滙控（00005）嘅活動中見到佢，尋日佢話咗個好消息畀大家知，佢已經復工喇，仲已返咗工幾個月添，鄭大班咁熟滙豐嘅業務，與內地關係又咁好，絲絲希望佢繼續代表滙豐講多啲意見，大家至有裨益。
對上一次見鄭大班出席公開場合，已經係去年十月嘅中大活動，尋日佢同樣喺中大活動出現，皆因佢係中大校董會主席，梗係要畀面嚟撐場嘞！
絲絲尋日見到鄭海泉氣色都唔錯，佢就話自己身體好番晒喇，依家唔使再去覆診，佢仲話返咗工都有幾個月，好多謝大家嘅關心喎！
咁鄭大班會唔會好快退休呢？佢就話自己冇諗過呢樣嘢，如果論退休年齡，自己早就過咗，但退唔退休仍然要由董事局去決定。
至於滙控喺內地嘅發展大計，佢透露公司有興趣喺北京興建新總部大樓，又會繼續增開新分行。佢又話依家一直有與大陸聯繫，商討解決推出上海國際板嘅技術問題，期望國際板可以喺今年內推出，亦希望滙豐可成為首批喺國際板上市嘅公司。
鄭大班講起業務就琅琅上口，睇嚟佢冇因為病而偷懶，對業務發展跟得好足吓。
余絲韻