市場熱線：華潤水泥 新高在望

中國風電可予留意

呢兩日炒落後股反彈，尋日輪到鋼鐵股、內房股同航運股，呢幾個板塊係舊年「黑五類」之列，另兩類係火電股同風電股，如果根據瞌埋眼炒落後原則，短炒應該有得諗，但火電因電煤成本上升影響，成績表唔慌好睇；至於風電股亦有隱憂，但龍源（00916）尋日已回升4.7%，弱不禁風嘅中傳動（00658）同金風（02208）亦有起色，老古建議睇住中國風電（00182），睇吓有冇機會圓底上升。

講番前三類股份，上月開始澳洲昆士蘭有水災，刺激焦煤價格上升，對鋼鐵股其實不利；至於內房股，老古一向建議低吸，但今年仍限於炒上落；航運股則最畸形，波羅的海乾散貨指數聖誕淡季前跌到1,700幾點，差啲創咗舊年年內新低。挑通眼眉嘅投資者，舊年應該買碼頭股或者製造貨櫃嘅勝獅（00716），皆因航運業雖然復甦，但太多新船落水反而令運費下降，今年年頭話好旺，但睇舊年個BDI咁波動，今年都唔敢太樂觀。

短線策略係揀落後股、避開累積升幅太大嘅股票，所以本地零售股呢兩日都冇乜力，六福（00590）更跌3.5%。不過，祖國零售股遲啲有機會炒減稅，阿爺話刺激內需，因此買零售股合晒合尺，但內地盛行網上購物搶走唔少生意，尤其祖國嘅服務業質素不敢恭維，盞自己打爛自己飯碗。

香港興業（00480）一升就兩成半，直情當股仔炒，本地建築股如新昌（00404）、高力（01118）亦有異動，華潤水泥（01313）算係香港基建嘅受惠股，公司係華南水泥業龍頭，香港嘅水泥大部分由潤泥供應，海南島建設做國際旅遊島亦係佢率先得益。水泥行業基於運輸困難，所以揀水泥股以地區為先，爭崩頭未必係好事，好似水泥商一窩蜂去四川等災後重建，結果搞到水泥價格不升反跌。潤泥舊年尾連續公布兩單喺山西嘅投資，明顯係睇好當地水泥市場。

需求增加推升價格

管理層前排喺股東會之後話，上一季除稅後每噸水泥售價為410元人仔，按年升52%，預料一○年全年銷量3,200萬噸，按年大升1.46倍，而今年產能可望達5,000萬至5,300萬噸，原因係睇好內地基建同建材下鄉政策刺激水泥需求，並估計未來水泥價格會持續上升。

無論城鎮、鄉下、豪宅、廉租屋、基建、公路，全部都無水泥不行，所以今年水泥價格穩中帶升有一定根據，潤泥係PE高亦增長高嘅股，5.5元打底成功，有機會再創新高。

古勝