孖妹缸湖遊：藍籌輸家揀撈博翻身

人生起落無常，好記得前幾年一套電視劇嘅經典對白：「呢一刻你可能係Top of the World（最高位），24小時後可能會係Upside Down（由高處墜下）」。讀過吓經濟嘅祺祺，深明經濟與股市一樣有起伏周期，好彩高妹企得高、睇得遠，抱住物極必反嘅信念，提點咗祺祺唔少。

好似富士康國際（02038），去年爆升2.5倍，跑贏其他藍籌，今年佢依然排第一，不過係由尾數上嚟嗰隻，希望明年唔會再有連環跳樓嘅慘事發生啦。孖妹今次搵咗專家幫手，睇吓邊啲今年跌得好傷嘅股票，明年有機會大翻身由輸家變贏家，佢哋揀咗3隻有機會喺明年翻身嘅藍籌，分別係今年跌17.73%嘅中國人壽（02628）、跌19.95%嘅華潤置地（01109）以及跌14.34%嘅中國神華（01088）。

白：中銀國際研究執行董事白韌

梁：新鴻基金融分析員梁健兒

國壽硬淨可重返40元

祺祺：有人話若想投資內地股市，買隻國壽已經好夠，但國壽近期業績令人驚嚇，股價曾跌穿30元，會唔會震番落○九年嘅19元o架？

白：國壽呢兩季交出嚟啲數都唔係好得，但預期明年內地嘅基準利率會上調100點子，有助增加保險業利息收入；呢排滬綜指冇乜睇頭，只喺2,800至2,900點徘徊，明年飆升20%至30%都唔出奇，假設A股明年表現明顯比今年突出，將可增加國壽嘅投資收入。依家國壽股價喺31元左右，負面因素反映晒，之前跌穿30元後迅速反彈，如會再跌番落去都真係幾吸引。想佢重上歷史高位可能仲要等耐啲，但或者會喺6至12個月內重返40元，升幅可達29%。

高妹：即係話依家個價抵買啦，但我手頭上仲有啲「蟹貨」，止唔止蝕好呢？

白：保險業唔係周期性行業，收購及合併動作唔算頻密，短期刺激因素唔係太多，所以當然係長揸好啲啦。國壽嘅核心業務發展平穩，雖然增長可能會較前幾年放緩，但未至於會倒退或冇增長。保險業受政策及政治環境嘅干擾較其他行業輕微得多，呢類公司長遠冇大陰暗面，我贊成繼續持有。

平保利好因素已反映

祺祺：老實講，中國平安（02318）好似有多啲新亮點，我寧願買佢好過。

白：我就覺得國壽好啲，因為股價已大幅回調，而平保早前復牌後曾升至逾90元，利好因素已充分反映。的確，平保之前因收購深圳發展銀行而停咗牌好耐，而業界喺平保復牌後覺得佢嘅賣點更清晰，而且有新增長點，加上物業經營概念，誘使資金由國壽轉向平保，不過物業經營係一個趨勢，相信國壽遲早都會朝呢個方向走。

潤置後盾強 有力急彈

高妹：咁股友們應該大手買入抑或分段吸納？

梁：國壽本身與大市關聯性大，而恒指近期缺乏明顯方向，一有消息就會趁機調整，國壽表現亦會受影響。投資者可分段買入，先喺現水平作首注吸納，若跌穿30元就再入貨。

祺祺：恒指成分股中嘅內房股，以今年跌近兩成嘅華潤置地較受注目，呢隻股明年點睇？

白：潤置今年表現平平，與本身業務無關，而係因整個行業受政策影響，例如稅項改動以及針對發展商土地嘅措施來自四方八面，市場嘅憂慮一定未釋除，摸唔清明年初會唔會再有辣招出台。不過以潤置股價14元計，較NAV（資產淨值）有約20%折讓，加上母公司華潤集團嘅資產實力雄厚，相信母公司以後仍會注資及收購如旗下深圳萬象城嘅高質素項目。潤置過往增長與母公司嘅注資及收購動作有好高關聯性，相信可持續受惠。

神華一年目標睇41元

高妹：中央頻頻出招打壓樓市，咁內房股未來係咪冇運行？

白：潤置明年下半年股價可能會攀升至18元，若內房政策鬆綁，該股可快速反彈，甚至升到20元，現價入市唔算貴，但亦有跌番落12元低位嘅可能，所以應作長線投資。

祺祺：香港呢幾日天氣轉冷，今年嘅冬天特別凍，神華呢一類煤炭股有冇得諗？

梁：神華股價近期回落，好大程度係因為內地推出限價制度，唔畀大型煤企帶頭加價，增加咗市場憂慮係最大嘅負面因素。雖然估計明年煤價嘅加價空間唔大，但應該唔會回調，內地煤炭用量大，對神華業務會有支持。

高妹：咁即係負面因素反映晒啦！

梁：神華最近獲母公司注資，市場憧憬呢個情況明年會繼續。神華現價唔貴，可考慮喺31元買入，一年目標價可以睇番41元。

孖妹喺聖誕節收到好多盒朱古力，細個時就聽媽咪講，話咳嗽時唔可以食甜嘢，如果唔係好難好。不過最近英國有研究發現，可可豆內有種叫「可可鹼」嘅物質，有效治久咳，而臨床試驗已到咗最後階段，仲有藥廠計劃喺兩年內用可可鹼製藥推出市場添。

所以話凡事都有兩面，好似朱古力咁，要辨清好壞需待時間證明，揀股票亦要花心機了解企業嘅優劣之處。唔講咁多，趁今日港股復市，等孖妹食多幾粒朱古力補充精神先！

38.9%股友今年有錢賺

二○一○年將近結束，回顧恒指今年表現反覆，最低見過18,971點，亦一度升至24,988點。你今年嘅股票投資成績如何？根據《東方日報》網上民調截至昨晚6時結果，話今年投資有賺嘅讀者佔38.9%，虧蝕嘅佔45.7%，其餘15.4%就話打個和。

高妹、祺祺

若有料報畀高妹同祺祺或有嘢問，可電郵money.biz@opg.com.hk