市場熱線：緊貼國策趨吉避凶

平安夜「大炒車」，唔係車股股價被炒起，而係統統失事。皆因北京卒之實施「限車令」，其實消息已經流傳多時，京城人呢排亦趕住買車，但估唔到消息對啲車股咁大影響。

汽車股有排閉翳

好多人都知道北京塞車同空氣污染情況嚴重，奧運後實施單雙車牌行車都效用唔大，所以實行一刀切，照計其他城市冇必要學北京，高盛話新政只係會令汽車整體銷量減少4.5%。不過，計埋取消購置稅優惠同汽車下鄉，車股其實真係幾閉翳，由舊年嘅國策股突然變成國策排擠股，睇嚟出年汽車銷量能達到增長15%嘅目標已經要偷笑。

汽車銷量影響到好多行業，香港上市嘅汽車分銷商已經有4間，另外有做汽車玻璃嘅信義（00868）、汽車零件嘅敏實（00425）、車胎鋼簾線嘅興達（01899）同寶佳（00103）、汽車摩打嘅德昌（00179），其他較細嘅都有十幾隻，公路股同鋼鐵股亦間接受影響。

其實中央一向嘅政策係想用公交取代汽車，但一場金融海嘯令到祖國為「保八」而搞慶個車市。未來正路仍係多起地鐵，所以車股當災之後，代之而起嘅國策股係南車（01766）、中鐵（00390）、中自化（00569）等鐵路概念股。

喺市靜之時，又會諗吓炒零售股，今個聖誕假香港零售肯定可報佳音，風水輪流轉，掃貨由北上變為南下。海南剛宣布將「離島免稅」嘅個人每次上限定為5,000蚊人仔，咁啱大陸海關早排抽稅嘅界線亦係5,000蚊，即係擺明同香港搶生意。台灣出年都會開放畀大陸客自由行，但台灣奢侈品抽重稅，而香港嘅優勝處係唔使坐飛機。

又講番國策，市場估計手機出年會納入家電以舊換新品種，唔使問阿貴，手機係換得最快嘅「電器」，平均十幾個月就換一部；如果有得以舊換新，豈不是加快換機速度？兩隻手機股TCL通訊（02618）同中國無線（02369）今年已經好標青，如果消息證實，應可更上一層樓。

TCL通訊走勢強

手機係「供應製造需求」嘅特別例子，TCL通訊今年手機銷量的確好勁，單係十一月就已經賣咗438萬部手機，比舊年同期多咗一倍不在話下，比十月亦多14%。講走勢，隻股唔理大市跌勢一枝獨秀，剛宣布計劃發行TDR，預測PE只係16倍幾，以高增長股來講，炒上20倍水平亦不為過，相當於股價9.27元。

戰報

康哲藥業（00867）+7%

詩詩本月十五日推介康哲藥業，當日低位5.97元，上周五創6.4元新高，累計升幅逾7%。

華藝礦業（00559）+10%

古晨上周五指華藝礦業或者後着，股價高見0.365元，以低位0.33元計，單日升幅逾一成。

古勝