今年初內地有兩個房地產公眾人物打賭，估今年中國樓價會唔會升超過5%，輸嘅就要從此封口，唔再評論樓價。依家臨近年尾，勝負當然好明顯啦，但點解呢場戲咁好睇？因為輸賭嘅雙方被視為「一正一邪」，「正方」眼見自己就嚟要輸，居然話呢場打賭冇開始過。
發起呢場打賭嘅，係人稱「房地產三劍俠」之一、有「最具影響力房地產評論家」美譽嘅牛刀，佢經常喺自己嘅博客為大眾抱打不平，而且對樓市經常有獨到及準確嘅預測，佢嘅博客點擊率超過500億人次，不過喺年初佢估今年樓價升少過5%，可謂老貓燒鬚。
佢嘅對手係人稱「任大炮」、不時口出狂言話「房地產就該是暴利行業」嘅北京華遠集團總裁任志強，呢位仁兄最近出席公開場合，公開向記者回應年初打賭時話「我贏了！」。
十二月樓市數據雖然未公布，但綜合今年截至十一月數字估計，內地樓價升幅都應該有6%。牛刀似乎見勢色唔對，喺自己嘅博客撰文，叫「任志強先生，請你撤銷房價賭局！」佢話年初時任志強都冇回應要接受呢場打賭，喺年尾重提有何居心？佢仲話人哋判斷錯漏百出，如果賭落去一定會身敗名裂喎。雙方各有「粉絲」支持，喺網上輪流留言開火。
余絲韻