市場熱線：越地資產折讓吸引

恒指收市上升355點，報22,994點，但成交縮到唔夠600億元，顯示散戶仍然唔敢輕舉妄動，芬佬亦都提早放假。

寶勝仍具冷敲價值

尋日港股的確充滿反彈條件，A股同美股期貨亦都配合，藍籌股得呢排最硬淨嘅二奶電話（00762）冇升跌，連祖國移動（00941）上個月上客咁少都有得升；今年就快完，但3G上客速度仲係好慢，電信部出年可能要出新招吸客，而最實際就係減價。

體育用品股繼續捱沽，國產貨避之則吉，因為唔知會否成為下一隻李寧（02331）或中動向（03818）。但如果仍睇好祖國零售市道嘅話，不妨考慮吓寶勝（03813），佢純做零售，冇本身牌子反而安全，而且代理adidas同Nike兩大牌子可能會逐步壟斷祖國市場，但缺點係競爭會較激烈。

滬綜指尋日反彈1.8%重上2,900點，祖國尋日召開中央農村工作會議，但食品股同化肥股呢排仍係死蛇爛鱔，皆因物價管制係條大刺，淨得農機股一拖（00038）再上試新高。呢次調控可能會持續至農曆新年後，但長線投資者可以趁低儲啲雨潤食品（01068）同神冠（00829）。

古勝呢個月兩次叫人買內房股，雖然個市唔將就，但總算跑贏大市，其實前日中央出招住地價，但內房股仍然冇跟住個市下跌，就足以證明呢類股走勢偏強，再講之前發展商高價投地王，有人溢價高一成買遠地（03377），你估人哋嫌錢腥咩？出年樓市會全面復甦，依家買定啲內房股此其時也！中央屢次鬥地主都唔見效，實行冇眼睇，等批保障房起好之後，索性分開兩個市場。

去蕪存菁主攻地產

古勝之前對內房股嘅策略係見低買番啲，一炒高就即刻閃，但依家調控政策已去到無計可施地步，所以可以放膽揸中線。不過，內房股幾十隻咁多，要揀都幾辛苦。睇公仔圖，越秀地產（00123）處於三角形走勢，唔係爆上就係爆落，老古既然睇好內房股，當然係認為爆上機會較大。

越地啱啱賣咗超市業務，擺明專心搞地產；公司今年賣樓好似麻麻，但其實已超過全年目標。

德銀出過份報告建議買入，原因係佢資產折讓達三成，呢個折讓幅度喺內房股來講唔算多，但越地係老牌發展商，財政亦處於安全水平，好過買用十幾厘息借錢嘅內房股。

戰報

北方礦業（00433）12%

桃桃上周五指北方礦業升勢未盡，昨日高見0.36元，以推介當日低位0.32元，累積升幅12.5%。

順誠（00531）+16%

股博士於上周四指順誠料可穩步上揚，當日低位1.53元，昨日高見1.79元，累積升幅16.9%。

古勝