周大福喺K11旗艦店正式開設咗第一條鐘錶街，尋日大事慶祝，聖誕節臨近，唔少高層都打算暫且放低工作，陪屋企人輕鬆吓，但周大福董事總經理黃紹基就話唔打算放假，加上早前已經常到外地出差，所以今個聖誕會留喺香港，巡吓舖都好開心喎。佢又話今年生意咁好，應該有得加人工，加幾多就未知，總之應該會係員工滿意嘅加幅喇！
生意好就梗係多得內地遊客消費，周大福喺尖沙咀開設鐘錶街就更加吸引內地遊客，黃紹基話內地遊客好鍾意瑞士名錶，鐘錶銷售額六、七成都嚟自內地客，聖誕節鐘錶銷售料較去年有三成增長。上月底公司搞咗內地貴賓團來港消費，十幾人嘅團總消費額已超過百萬元，佢哋嚟緊仲會繼續搞貴賓團來港過聖誕節及新年，相信總消費額會唔錯。
尋日周大福特登展出咗幾隻世界限量名錶，其中貴到一隻價值千萬元都有。公司依家喺本港及內地共有200個鐘錶零售點，明年計劃喺內地增多10個，希望做到金飾珠寶及鐘錶雙線發展。
余絲韻