絲絲講場：和田玉製上市賀禮 重農行贈玉璽矜貴
絲絲尋日先講過近排上市公司送禮冇乜新意，重慶農行（03618）尋日首日掛牌就整咗個玉璽送畀港交所（00388），夠創意之餘仲非常「重手」，皆因呢個玉璽原來除咗係用琉璃製造，仲加咗出晒名嘅和田玉！
有公關老友話，重農行話晒都係第一家喺香港上市嘅內地農村商業銀行，所以準備嘅禮物都特別隆重，今次送畀港交所嘅玉璽，印出嚟嘅字樣係「重慶農村商業銀行」，第日用嚟出公告都得，至於玉璽嘅四面就分別印有「誠信」、「發展」、「創新」及「合作」，都係公司嘅座右銘。
中國五大名玉之一
絲絲份人最實際，最關心梗係想知呢個玉璽用咗幾多錢製造，老友就賣關子話唔講得，不過絲絲知道和田玉係中國五大名玉之一，仲有傳話成語「完璧歸趙」內價值連城嘅和氏璧，就係用和田玉製作而成，可想而知呢個「重農行玉璽」真係唔慌平得去邊！
余絲韻