絲絲講場：大摩合唱團聖誕送暖
大摩一眾高層平日忙於睇實大市，仲不時吹奏「摩笛」引發股價波動，不過尋日絲絲再次見識呢班高層嘅音樂造詣時，就一啲都唔驚，仲寧舍溫暖，皆因「摩根士丹利董事合唱團」趁聖誕佳節又再出動，第二年喺「圓方」演唱聖誕歌兼為慈善機構籌款。大摩亞洲首席執行官唐奧文負責領唱之餘，台上又有香港保護兒童協會嘅小朋友伴唱，加上現場有贊助商嘅熱朱古力及曲奇，令所有觀眾都暖在心頭。
大摩已經連續第13年支持「愛心聖誕大行動」（Operation Santa Claus），今年開始籌備時，佢哋曾考慮改變傳統，或加入跳舞元素甚至難度較高嘅聖誕歌，但經過一番討論後，都係選擇透過歌聲籌款，今年大摩有超過90位管理層獻唱8首歌，無論人數、歌曲數量都有加冇減，就連善款亦再創新高。
一周籌210萬善款
唐奧文話，佢哋由本月九日開始籌款，大摩嘅員工、客戶及夥伴已成功喺短短一周內籌到210萬元，突破去年嘅190萬元捐款。大摩全球援助服務主題着重小朋友健康，所以今年籌款對象係「微笑行動」嘅「2011年春之微笑」（Spring Smaile 2011），呢個計劃主要幫助內地杭州近300位小朋友，進行顎裂及兔唇手術。
余絲韻