絲絲講場：趙國雄為女改名加個a
屬於年輕「八十後」嘅趙宇（Justina）不但係置富產業信託（00778）副行政總裁，亦係長實（00001）執行董事趙國雄（Justin）嘅愛女，兩父女嘅英文名只係相差一個英文字母。
絲絲尋日見到Justina，當然趁機會問吓佢，佢話出世紙已經有登記英文名Justina，唔知爸爸點解幫佢改呢個英文名，不過佢就笑稱：「可能係佢懶」，喺自己個英文名加多個a字就算數。Justina仲話雖然個名較男性化，但亦比較特別，所以都幾好吖。
置富產業信託今年三月以介紹形式喺香港上市，佢哋旗下有唔少商場，聖誕節臨近，大大小小嘅商場都會大搞節日活動，置富產業信託亦會請歌手到商場表演。
男歌手表演利商場消費
Justina話自己比較偏好請男歌手，今個聖誕節佢哋就請咗4個歌手，3個係男歌手，女歌手只有1個，絲絲好奇想知點解男多過女。Justina話男歌手嘅女「粉絲」比較多，女仔睇完表演後，好多時會留喺場內買嘢、食嘢，自然有助推高生意額，至於男「粉絲」隨時只係食個包就走人，所以男、女「粉絲」嘅消費力係有好大差別。
今年先至29歲嘅Justina，已經做咗公司董事，負責置富產業信託嘅整體表現及發展方向。
余絲韻