蘋果公司嘅平板電腦iPad除咗風靡萬千少男少女之外，亦俘虜咗一眾日理萬機嘅「賓卡」。絲絲最近收到風，摩根大通、摩根士丹利及瑞信等大行好體貼咁幫佢哋嘅「賓卡」訂咗大批iPad，實行做到一人一機，方便佢哋工作咁話，不過咁就搞到原本獨霸華爾街智能手機嘅廠商RIM好頭痕，事關好多「賓卡」都話對部iPad愛不釋手，仲捨棄埋陪伴咗佢哋多年嘅「老友」黑莓。
其實RIM亦唔係坐以待斃，為咗與iPad爭一日之長短，佢哋急急腳推出咗叫PlayBook嘅平板電腦迎戰，仲話已經收到永明金融、ING等大行嘅柯打。
不過RIM嘅形勢就真係認真麻麻，除咗iPad，蘋果公司嘅另一王牌iPhone都好受大行歡迎，大行除咗鼓勵員工用iPhone，仲整咗好多apps加強與客戶嘅關係，令iPhone嘅銷量直線上升，仲喺去季超越黑莓，難怪蘋果公司嘅教主喬布斯之前好得戚咁話RIM拍馬都追唔上啦。
余絲韻