講起周文耀（阿Paul），好多人都噏得出佢喺金融業嘅成績，查實佢與ICT（通訊科技）嘅淵源好深，依家佢做埋數碼港主席，仲呼籲大家千祈唔好忘記香港除咗金融行業外，仲有ICT行業呢隻金蛋！
佢早年喺港大主修電機工程，轉投金融界之前更曾喺IBM工作，可謂本港第一批IT人。由退任港交所（00388）行政總裁至今，佢好少喺公眾場合再講證券金融呢瓣，好多人都話可惜，阿Paul反而覺得人生喺不同階段就應有不同嘅發展，依家佢對本港金融行業嘅發展，基本上已經絕口不提。
講番數碼港，阿Paul係第二任主席，唔覺唔覺數碼港由規劃到投入運作原來已經有十個年頭，阿Paul亦承認即使到目前為止，好多人仍誤解數碼港係地產項目，但其實數碼港由始至終都係以推動科技行業發展為使命，透過企業培育計劃成就咗唔少新嘅科技企業，佢與董事局定下嘅目標，就係要使數碼港進一步成為促進亞太區ICT產業發展嘅平台。
佢仲提醒港人絕對唔應該睇輕ICT產業嘅貢獻，大家日日用嘅「八達通」就足以證明香港嘅IT應用有幾出色，對於呢隻金蛋大家真係要懂得珍惜。
余絲韻