華資企業嘅傳統，係希望將盤生意一代一代傳落去，近期有唔少富二代、富三代已經開始跑出。絲絲尋日見到一段有關日本物業投資嘅分析，今年九月至成為香港興業（00480）執行董事嘅查燿中（Benjamin）大談喺日本投資物業嘅意見，都講得有板有眼。
Benjamin今年才36歲，係香港興業副主席查懋成之子，為人低調，佢最近喺日本搵投資機會，佢話相比歐美投資者，亞洲投資者就水頭充足。睇番資料，香港興業早前才將荃灣愉景新城商場及1,000個停車場車位嘅餘下50%權益賣咗畀Partner新世界（00017），袋番13.782億元，果真係水頭充足。
香港興業對日本嘅物業市場一啲都唔陌生，近年佢哋喺日本已經有唔少投資項目，好似喺今年七月就公布會收購日本東京港區六本木一幢住宅樓宇，涉資約3.08億元，仲要係以現金支付。今次由Benjamin再去勘察，公司資本充足，應該係無寶不落。
點解佢哋咁鍾情投資日本物業？Benjamin畀咗少少貼士，佢話以日本嘅住宅市場為例，收益率非常穩定，而大陸及香港嘅增長波動性較高，日本相對定價有吸引力，而且大陸嘅政策因素亦都冇人估到，佢相信由亞洲投資者主導嘅市場會保持一段時間。
另根據聯交所資料，受益人為查氏家族嘅CMM Trust，旗下持股52.24%嘅CDW盡沽香港興業5.36%股權，令CMM及一眾查氏家族成員包括查燿中喺香港興業嘅持股量下跌，不過另一受益人同為查氏家族嘅股東LBJ，喺香港興業嘅股權就由6.41%增至7.88%。
余絲韻