市場熱線：三一國際逆市呈強

家電股淡市下突圍

西班牙單嘢一出，其實外匯市場歐元同美金反應唔算大，道指期貨亦未見插水，港股尋日嘅反應實在太誇張，恒指連23,000點都不保，依家距離條頸線只差200點左右，國指連100日線都穿埋。

藍籌股尋日得中遠太平洋（01199）一隻微升，但另一碼頭股招商局（00144）則跌4.15%；大笨象（00005）下晝開波曾跌穿80蚊，但尾市回穩收報80.8元。飛機股前日回升之後，尋日又再插過，祖國飛機股就話驚高鐵搶客啫，連大飛機（00293）都大跌7.17%。逆市奇葩嘅係家電股，借住「家電下鄉」銷售數據炒上，海爾（01169）同科龍（00921）均創新高，水泥股亦繼續有資金捧場。

兩電又話加價，遲啲巴士、小巴、的士樣樣加，食品更加唔使講。祖國人行做問卷調查，有45%受訪者話會增加投資。喺通脹環境之下，好多人變咗「焗賭」，相信呢兩個月唔少香港人投入魚缸，依家變咗大閘蟹。

老美出年幾時加息事關重大，前晚聯儲局會後聲明冇乜特別，美資大行話出年都唔使旨意，但利率期貨就預示出年第三季加息。「阿伯」話通脹一超過2%，聯儲局15分鐘內就會加息，古勝等住睇佢幾時自摑嘴巴。

中聯重科（01157）招股3日反應只係麻麻，尋日再跌一跌難免會影響散戶信心，好在呢排嘅新股都頂得住唔使破底。今日掛牌嘅重農行（03618）同埋中聯重科係今年嘅壓軸新股，兩隻工程機械影子股：龍工（03339）同三一國際（00631）亦有人炒，其實後者個阿媽三一重工都有計劃出年來港上市，到時有機會子憑母貴。

預測市盈率仍合理

三一國際主要係造採煤嘅挖進機，同國際煤機（01683）至係同行，祖國煤炭已供不應求，由淨出口變為淨入口，對挖進機嘅需求亦繼續增加。三一亦積極開發煤礦救生系統，喺細煤礦陸續被大煤企兼併之後，相信會更注重煤礦安全性。三一預測PE28倍左右睇落幾貴，但計埋每年複式增長30%以上就變得合理。

隻股喺十月時升到14蚊遇到阻力，然後兩次跌穿11蚊後有反彈，顯示孖屐認為呢個估值都算合理，佢呢排仍於上升軌當中，有機會再上衝14蚊。

戰報

中國聯通（00762）+9%

小尾上周三推介聯通時，低位只有10.52元，昨日股價高見11.52元，累積升幅9.5%。

山水水泥（00691）+7%

上月三十日古勝推介山水水泥，昨表現堅挺，高見6.58元，較推介當日低位6.12元升7.5%。

古勝