嚟緊大家可能會發覺星展銀行「無處不在」，事關佢哋投資咗1,800萬元，推出橫跨6個國家嘅品牌推廣活動，尋日絲絲就見到星展香港行政總裁龐華毅（Sebastian）行色匆匆，原來佢約咗300名客戶一齊欣賞星展嘅新廣告，順道慶祝聖誕節。
Sebastian話今次嘅宣傳策略搞搞新意思，邀請咗星展嘅客仔做主角。絲絲八到旺旺集團（00151）副總裁蔡旺家、李寧（02331）首席財務官兼執行董事鍾奕祺都有參與平面廣告，而影音廣告除咗喺電視見到，仲會喺亞太區幾條飛機航線上播放，可謂去到邊都見到佢哋嘅宣傳。
既然咁揼本宣傳，星展香港來年有乜目標？Sebastian話希望貿易業務有雙位數增長，特別喺人民幣貿易結算上，期望兩至三年內市佔率提升至一成以上。其實佢哋嘅貿易業務一向做得唔錯，相信要達到目標唔係難事。
余絲韻