論人氣，騰訊（00700）嘅馬化騰或者比唔上蘋果公司嘅喬布斯，不過論整體業務嘅增長，蘋果公司就未必及得上騰訊。《彭博商業周刊》最新公布嘅「一○年全球五十大增長科技企業」，騰訊成功超越蘋果公司排名全球第一，上榜嘅亦包括排名第3嘅內地搜尋網站百度，以及喺香港土生土長嘅偉易達（00303）！
喬布斯一手設計嘅iPad喺推出嘅首80日，創下300萬部銷售紀錄，除咗為蘋果公司帶嚟另一增長點外，更成功帶領PC工業步入「平板電腦元年」，不過《彭博商業周刊》嘅增長科企排名榜，除咗考慮業務創意外，股價、利潤、股本回報及僱員增長情況都係評估準則，絲絲研究過呢個排名，發現過去一年蘋果公司65.2%嘅市值增長，雖然勝過騰訊嘅33.4%，不過論股本回報，騰訊就以51.9%超過蘋果公司嘅33.7%，再加上騰訊過去一年64%嘅銷售增長以及內地互聯網行業嘅增長潛力，所以騰訊就壓倒蘋果公司排名第一。
至於香港土生土長嘅偉易達雖然只係排名第8，但就係唯一上榜嘅香港企業，排名仲叻過Dell（排名31）及思科系統（排名47），所以大家真係唔好話香港無屬於自己嘅科技工業！
余絲韻