私人銀行成日要周圍搵生意，滙豐私人銀行就度到條好橋，贊助各地嘅高爾夫球賽事，順便趁機搵客，目標係高爾夫球運動員及喜歡Golf嘅人，因為通常佢哋都係有錢人。
滙豐私人銀行好積極爭取贊助高爾夫球賽事，已訂咗一個5年贊助計劃，其中包括明年一月嘅阿布扎比高爾夫球賽以及七月嘅英國高爾夫球賽。作為贊助商，出錢又出力絕對唔簡單，佢哋咁肯使錢梗係計過晒數啦。
該行人士話，專門贊助高爾夫球賽可藉此與Golf運動員建立良好關係，佢哋分分鐘可以成為客戶，好似全球最搵錢嘅運動員，其中一位就係「老虎仔」活士，而且Golf運動員生涯較長，可以由17歲打到至70歲，搵錢搵足五十幾年。
另外，滙豐贊助高爾夫球賽事有助提高喺亞洲地區嘅知名度，過去5年都係贊助喺上海嘅賽事，亞洲區中產人士認為打Golf係身份象徵，當佢哋打Golf時，自然可以聯想起滙豐嘅服務。
余絲韻